"നിങ്ങള്‍ക്ക് രാത്രിയാണോ പകലാണോ കൂടുതല്‍ ഇഷ്ടം....."
മാഷ്‌ ബ്ലാക്ക് ബോര്‍ഡില്‍ നിന്നും തിരിഞ്ഞു കൊണ്ട് ചോദിച്ചു...
"രാത്രി - പകല്‍-രാത്രി- പകല്‍ "
കുട്ടികള്‍ ഇടതടവില്ലാതെ വിളിച്ചു പറഞ്ഞു....
"അതെന്താ,കാരണം കൂടി പറയൂ.."
"പകലാകുമ്പോ കുറേ നേരം കളിക്കാം..."
"രാത്രി ഒരുപാട് നക്ഷത്രങ്ങള്‍ കാണാം"
" രാത്രി ഉറങ്ങാം"
"രാത്രി സ്കൂളില്‍ പോകണ്ട "
ക്ലാസ്സില്‍ കൂട്ടച്ചിരി ഉയര്‍ന്നു......
"രാധയെന്താ ഒന്നും മിണ്ടാത്തത്...."
എല്ലാ കണ്ണുകളും ജനലില്‍ കൂടി പുറത്തേക്ക് നോക്കിയിരിക്കുകയായിരുന്ന രാധയിലേക്ക് തിരിഞ്ഞു,
"ഞാന്‍ ,അത് പിന്നെ...." പാവാടയില്‍ തിരുതിപിടിച്ച് കൊണ്ട് രാധ എഴുന്നേറ്റു.....
"ഇതേതു ലോകത്താ,ഇവിടെനടക്കുന്നത് വല്ലോംഅറിയുന്നുണ്ടോ,?"
മാഷ്‌ ചിരിച്ചുകൊണ്ട് അടുത്തേക്ക്‌ ചെന്നു,
"മ്"
"എങ്കില്‍ പറയൂ, രാധയ്ക്കു രാത്രിയാണോ പകലാണോ കൂടുതല്‍ ഇഷ്ടം?"
"എനിക്ക്,എനിക്ക്....."
രാധയുടെമനസ്സിലൂടെ നൂറുചിന്തകള്‍ഓടിമറഞ്ഞു,
രാത്രിയില്‍ ഓലപ്പുരയില്‍ അമ്മയോട് ചേര്‍ന്ന് കിടക്കുമ്പോള്‍ ഇഴഞ്ഞു വരുന്നഅച്ഛന്റെ കൈകള്‍,ചാരായത്തിന്റെയും ബീഡിയുടെയും രൂക്ഷഗന്ധം......
പകലില്‍ ശരീരത്തെ കൊത്തിവലിക്കുന്നപോലെ കൊതിപൂണ്ടുനോക്കുന്ന കണ്ണുകള്‍,
രാത്രിയോ പകലോ എപ്പോള്‍ വേണമെങ്കിലും തന്റെമേലെ ചാടിവീണ് കടിച്ചു കീറാന്‍, വട്ടം ചുറ്റി, നാവു നുണഞ്ഞു നടക്കുന്ന വേട്ടമൃഗങ്ങള്,പരിചിതമായ മുഖങ്ങള്‍ ഉള്ള, ഒരുപാട് വേട്ടമൃഗങ്ങള്....
"പറയൂ,രാധയ്ക്കു രാത്രിയാണോ പകലാണോ കൂടുതല്‍ ഇഷ്ടം.."
"എനിക്ക്...എനിക്ക്...."
ആ കുഞ്ഞു ചുണ്ടുകള്‍ വിതുമ്പി...
പുറത്തപ്പോഴും ഇരയെ കാത്ത് വേട്ടമൃഗങ്ങള് അക്ഷമയോടെ വട്ടംചുറ്റി നടന്നിരുന്നു,നാവ് നുണഞ്ഞു കൊണ്ട്......
No comments:
Post a Comment